ராமநாதபுரம் | செப். 21
ராமநாதபுரம் செய்யது அம்மாள் பொறியியல் கல்லூரியில், செய்யது அம்மாள் புத்தாக்க மற்றும் தொழில் வளர்ப்பு மையம் (SAIIC) சார்பில் மாணவர்களின் புதுமையான சிந்தனை மற்றும் தொழில்முனைவுத் திறனை ஊக்குவிக்கும் வகையில் ‘கனவு நினைவாகுதல் – Dream2Reality 2026’ நிகழ்ச்சி நடைபெற்றது. PSG-STEP கோயம்புத்தூர், டிரெண்ட் மற்றும் அட்லஸ் காப்கோ குழுமம் இணைந்து நடத்திய இந்நிகழ்ச்சியின் மூலம், மாணவர்களின் புதுமையான யோசனைகளை அடையாளம் கண்டு அவற்றை நடைமுறைப்படுத்தக்கூடிய தொழில் மற்றும் ஸ்டார்ட்அப் முயற்சிகளாக மாற்றுவதற்கான வழிகாட்டுதல்கள் வழங்கப்பட்டன.
நிகழ்ச்சியில் விருட்ஷா நிறுவனத்தைச் சேர்ந்த பாரத் மோகன், PSG-STEP நிறுவனத்தைச் சேர்ந்த மணிகண்டன் ஆகியோர் சிறப்பு விருந்தினர்களாக கலந்து கொண்டு, தொழில்முனைவு, புதுமையான சிந்தனை, ஸ்டார்ட்அப் வாய்ப்புகள் மற்றும் யோசனைகளை வெற்றிகரமான தொழில் முயற்சிகளாக மாற்றுவது குறித்து மாணவர்களுக்கு விளக்கினர். மாணவர்கள் தங்களது புதுமையான திட்டங்கள் மற்றும் தொழில்முனைவு யோசனைகளை முன்வைத்த நிலையில், அவற்றின் நடைமுறைச் சாத்தியக்கூறுகள், சந்தை வாய்ப்புகள் மற்றும் மேம்படுத்த வேண்டிய அம்சங்கள் குறித்து வல்லுநர்கள் ஆலோசனைகளை வழங்கினர்.
கல்லூரி முதல்வர் முனைவர் பெரியசாமி பேசுகையில், மாணவர்கள் வேலைவாய்ப்பை நாடுபவர்களாக மட்டுமின்றி, வேலைவாய்ப்புகளை உருவாக்கும் தொழில்முனைவோர்களாகவும் உருவாக வேண்டும் என்ற நோக்கில் இதுபோன்ற புத்தாக்க மற்றும் தொழில்முனைவு நிகழ்ச்சிகள் தொடர்ந்து நடத்தப்படும் என்றார். நிகழ்ச்சியின் நிறைவில், செய்யது அம்மாள் புத்தாக்க மற்றும் தொழில் வளர்ப்பு மையத்தின் செயல் அதிகாரி முனைவர் கார்த்திகேயன் நன்றி கூறினார்.
