சிவகங்கை, ஆக.31.
சிவகங்கை மாவட்டம் காரைக்குடியில் குளோபல் மிஷன் மருத்துவமனை ஆராய்ச்சி மையம், காரைக்குடி ரோட்டரி சங்கம் மற்றும் காரைக்குடி வெல்பர் அசோசியேஷன் இணைந்து நடத்திய மாபெரும் இலவச எலும்பு அடர்த்தி பரிசோதனை மற்றும் மூட்டு வலி மருத்துவ முகாம், காரைக்குடி குளோபல் மிஷன் மருத்துவமனையில் சிறப்பாக நடைபெற்றது. முகாமில் நூற்றுக்கணக்கான பொதுமக்கள் கலந்து கொண்டு பல்வேறு மருத்துவ பரிசோதனைகள் மற்றும் ஆலோசனைகளை இலவசமாகப் பெற்று பயனடைந்தனர்.
நிகழ்ச்சிக்கு மருத்துவமனை சேர்மன் டாக்டர் குமரேசன் தலைமை வகித்து, வருகை தந்த அனைவரையும் வரவேற்றார். சிறப்பு விருந்தினராக எல்.ஐ.சி. முகவர் சங்கத் தலைவர், மதுரை கோட்டம் மரிய லுயிஸ் கலந்து கொண்டு சிறப்புரையாற்றினார். காரைக்குடி ரோட்டரி சங்கத் தலைவர் ருக்மா சரவணன் வாழ்த்துரை வழங்கினார். மேலும், காரைக்குடி வெல்பர் அசோசியேஷன் சார்பில் இஸ்மாயில் வாழ்த்துரை வழங்கினார்.
மருத்துவ முகாமில் நான்கு சிறப்பு எலும்பு மற்றும் மூட்டு அறுவை சிகிச்சை நிபுணர்கள் பங்கேற்று, பொதுமக்களுக்கு எலும்பு மற்றும் மூட்டு தொடர்பான பிரச்சினைகள் குறித்து பரிசோதனை செய்து மருத்துவ ஆலோசனைகளை வழங்கினர். குறிப்பாக மூட்டு வலி, எலும்பு தேய்மானம் உள்ளிட்ட பிரச்சினைகள் தொடர்பாக பொதுமக்களுக்கு தேவையான வழிகாட்டுதல்கள் வழங்கப்பட்டன.
மேலும், வாசன் கண் மருத்துவமனை சார்பில் பொதுமக்களுக்கு இலவச கண் பரிசோதனையும் மேற்கொள்ளப்பட்டது. இதனுடன் பிசியோதெரபி மற்றும் ஆயில் தெரப்பி சிகிச்சைகளும் முகாமில் வழங்கப்பட்டன. பல்வேறு வயதினரும் கலந்து கொண்டு தங்களது உடல்நலம் தொடர்பான பரிசோதனைகளை மேற்கொண்டு மருத்துவர்களிடம் ஆலோசனைகளை பெற்றனர்.
இந்த மருத்துவ முகாம் மூலம் ஏராளமான பொதுமக்கள் ஒரே இடத்தில் பல்வேறு மருத்துவ சேவைகளை இலவசமாகப் பெற்றனர். நிகழ்ச்சிக்கான ஏற்பாடுகள் மற்றும் ஒருங்கிணைப்புப் பணிகளை காரைக்குடி குளோபல் மிஷன் மருத்துவமனை சார்பில் விவேகானந்தன், டைம்ஸ் ஹெல்த் பவுண்டேஷன் மற்றும் சாரிட்டபிள் டிரஸ்ட் ஆகியோர் இணைந்து சிறப்பாக மேற்கொண்டனர்.
