சிவகங்கை, அக். 6:
காரைக்குடி அருகே உள்ள பள்ளத்தூர் பேரூராட்சியில் ஒவ்வொரு வெள்ளிக்கிழமையும் வாரச்சந்தை நடைபெற்று வருகிறது. இந்த வாரச்சந்தையில் ரூ.75 லட்சம் மதிப்பீட்டில் பராமரிப்பு பணிகள் மேற்கொள்ளப்பட்டுள்ள நிலையில், தற்போது வாரச்சந்தையை ஏலம் விடுவதற்கான நடவடிக்கைகளை பேரூராட்சி நிர்வாகம் மேற்கொண்டு வருகிறது.
இதுகுறித்து அப்பகுதி சமூக ஆர்வலர்கள் கூறுகையில், வாரச்சந்தை ஏலம் தொடர்பான முழுமையான விவரங்களை பொதுமக்கள் அறிந்து கொள்ளும் வகையில் ஒலிபெருக்கி மூலம் அறிவிப்பு செய்ய வேண்டும் என்றும், அரசு அலுவலகங்களில் அறிவிப்பு சுவரொட்டிகள் ஒட்டுவதுடன், பேருந்து நிலையம் உள்ளிட்ட பொதுமக்கள் அதிகம் கூடும் இடங்களில் ஏலம் தொடர்பான தகவல் பதாகைகள் வைக்க வேண்டும் என்றும் கோரிக்கை விடுத்துள்ளனர்.
மேலும், வாரச்சந்தை ஏலம் முழுமையாக அரசு வழிகாட்டுதல்களை பின்பற்றி நடத்தப்பட வேண்டும் என்றும், ஏலத்தில் பங்கேற்கும் வகையில் ஏழை, எளிய மக்களுக்கும் வாய்ப்பு கிடைக்கும் வகையில் வைப்புத்தொகை நிர்ணயிக்கப்பட வேண்டும் என்றும் அவர்கள் வலியுறுத்தியுள்ளனர்.
வாரச்சந்தை ஏலம் தொடர்பான நடவடிக்கைகளில் தனிநபர் தலையீடு மற்றும் அரசியல் தலையீடு இருக்கக்கூடாது என்றும், ஏல நடைமுறைகள் அனைத்தும் வெளிப்படைத்தன்மையுடன் நடைபெற வேண்டும் என்றும் சமூக ஆர்வலர்கள் கோரிக்கை விடுத்துள்ளனர். அரசு விதிமுறைகளின்படி முறையாக அறிவிப்புகள் வெளியிட்டு, அனைவருக்கும் சமமான வாய்ப்பு வழங்கி ஏலத்தை நடத்த வேண்டும் எனவும் அவர்கள் வலியுறுத்தியுள்ளனர்.
