கிருஷ்ணகிரி, செப். 26:
போச்சம்பள்ளி அருகே உள்ள அகரம் அரசு மேல்நிலைப் பள்ளியில் நாட்டு நலப்பணித் திட்டம் (NSS) சார்பில் 7 நாள் சிறப்பு முகாம் தொடக்க விழா நடைபெற்றது. பள்ளித் தலைமை ஆசிரியர் விஜய்குமார் தலைமையில் நடைபெற்ற விழாவில், NSS திட்ட அலுவலர் செந்தில் வரவேற்புரை வழங்கினார்.
நிகழ்ச்சியில் முன்னாள் ஊராட்சி மன்றத் தலைவர் அறிவொளி இராமமூர்த்தி, ஓய்வு பெற்ற ஆசிரியர் ரமணன், நண்பர்கள் நலச்சங்கத் தலைவர் தியாகு, பள்ளி மேலாண்மைக் குழு உறுப்பினர்கள் பெரியண்ணன், சின்னசாமி, ஷிலா, மாதேஷ் உள்ளிட்டோர் கலந்து கொண்டனர். NSS மாணவர்கள் உறுதிமொழி ஏற்றுக்கொண்டனர்.
7 நாள் சிறப்பு முகாமில் பள்ளி வளாகத் தூய்மைப் பணி, கிராமத்தில் மரக்கன்றுகள் நடுதல், போதைப்பொருள் தடுப்பு விழிப்புணர்வு, சாலை பாதுகாப்பு விழிப்புணர்வு பேரணி, ஏரி மற்றும் குளம் தூய்மைப் பணி உள்ளிட்ட பல்வேறு சமூக நலப்பணிகள் மேற்கொள்ளப்பட உள்ளன. இதில் 25-க்கும் மேற்பட்ட NSS மாணவர்கள் ஆர்வத்துடன் பங்கேற்றனர். நிறைவில் அனைவருக்கும் இனிப்புகள் வழங்கப்பட்டன. தமிழ் ஆசிரியரும் துணை திட்ட அலுவலருமான நாகராஜன் நன்றியுரை வழங்கினார்.
