திருவனந்தபுரம் நவராத்திரி விழா: சுசீந்திரத்தில் இருந்து புறப்பட்ட முன்னுதித்த நங்கை அம்மன்

நாகர்கோவில், அக். 9

திருவனந்தபுரம் நவராத்திரி விழாவில் பங்கேற்பதற்காக, சுசீந்திரம் முன்னுதித்த நங்கை அம்மன் நேற்று காலை அலங்கரிக்கப்பட்ட பல்லக்கில் புறப்பட்டார்.இதையொட்டி சுசீந்திரம் கோயிலில் சிறப்பு பூஜைகள் நடைபெற்றன.

அம்மன் புறப்பட்டபோது தமிழக-கேரள மாநில போலீசார் துப்பாக்கி ஏந்தி மரியாதை செலுத்தினர். வழிநெடுகிலும் திரண்டிருந்த பக்தர்கள் மலர் தூவி அம்மனை வழியனுப்பினர்.சுசீந்திரத்தில் இருந்து புறப்பட்ட அம்மன் பல்லக்கு நேற்று மாலை கல்குளம் நீலகண்ட சுவாமி கோயிலை சென்றடைந்தது.

தொடர்ந்து, குமாரகோவிலில் இருந்து குமாரசுவாமி விக்கிரகமும் வெள்ளிக் குதிரையும் புறப்பட்டு, முன்னுதித்த நங்கை அம்மனுடன் இணைந்து பத்மநாபபுரம் அரண்மனைக்குச் செல்கின்றன. அங்கு உடைவாள் கைமாற்றும் நிகழ்ச்சி நடைபெறுகிறது.பின்னர் மூன்று விக்கிரகங்களும் ஊர்வலமாக திருவனந்தபுரம் புறப்பட்டு, அக்டோபர் 11-ஆம் தேதி மாலை நவராத்திரி மண்டபத்தைச் சென்றடைகின்றன.