தருமபுரி, அக்.5:
தருமபுரி மாவட்டத்தை வறட்சி பாதித்த மாவட்டமாக அறிவிக்கக் கோரி, மாவட்ட ஆட்சியர் அலுவலகம் முன்பு இந்திய விவசாயிகள் சங்கம் மற்றும் இந்திய விவசாய தொழிலாளர் சங்கம் சார்பில் கண்டன ஆர்ப்பாட்டம் நடைபெற்றது. மாவட்ட பொறுப்பாளர்கள் ரவி மற்றும் பச்சகவுண்டர் தலைமையில் நடைபெற்ற போராட்டத்தில் ஏராளமான விவசாயிகள் மற்றும் தொழிலாளர்கள் கலந்து கொண்டனர்.
ஆர்ப்பாட்டத்தை மாவட்ட செயலாளர் பிரதாபன் தொடங்கி வைத்து, விவசாயிகளின் கோரிக்கைகளை வலியுறுத்தி முழக்கங்களை எழுப்பினார். எல் நினோ பாதிப்பு மற்றும் கோடை, தென்மேற்கு பருவமழை போதிய அளவில் பெய்யாததால் தருமபுரி மாவட்ட விவசாயிகள் கடுமையாக பாதிக்கப்பட்டுள்ளதாக போராட்டத்தில் தெரிவிக்கப்பட்டது.
வறட்சியால் பாதிக்கப்பட்ட விவசாயிகளுக்கு எந்தவித நிபந்தனையும் இன்றி ஏக்கருக்கு ரூ.50 ஆயிரமும், ஒவ்வொரு விவசாய குடும்பத்துக்கும் ரூ.25 ஆயிரமும் இழப்பீடாக வழங்க வேண்டும் என கோரிக்கை விடுக்கப்பட்டது. மேலும், ஏரி, குளம், குட்டைகளுக்கு தண்ணீர் கொண்டு செல்லும் நீர்வரத்து கால்வாய்களை முழுமையாக தூர்வாரி நீர்நிலைகளை பாதுகாக்க வேண்டும் என்றும் வலியுறுத்தினர்.
60 வயதை கடந்த விவசாயத் தொழிலாளர்களுக்கு மாதம் ரூ.6 ஆயிரம் ஓய்வூதியம் வழங்க வேண்டும் உள்ளிட்ட பல்வேறு கோரிக்கைகளையும் வலியுறுத்தி ஆர்ப்பாட்டத்தில் முழக்கங்கள் எழுப்பப்பட்டன. சங்க நிர்வாகிகள், தொண்டர்கள் மற்றும் விவசாயிகள் என ஏராளமானோர் பங்கேற்றனர்.
