தருமபுரி | செப். 23:
அதியமான் கோட்டை பேரறிஞர் அண்ணா அரசு ஆண்கள் மேல்நிலைப்பள்ளியில் பெருந்தலைவர் காமராஜர் காலை உணவு திட்டத்தின் விரிவாக்க தொடக்க விழா நடைபெற்றது. மாவட்ட ஆட்சியர் சரவணன் திட்டத்தை தொடங்கி வைத்து, மாணவர்களுக்கு உணவு வழங்கியதுடன் அவர்களுடன் அமர்ந்து உணவருந்தினார்.
திட்டத்தின் விரிவாக்கம் மூலம் தருமபுரி மாவட்டத்தில் 225 அரசு மற்றும் அரசு உதவி பெறும் பள்ளிகளில் 6 முதல் 8-ம் வகுப்பு வரை பயிலும் 34,574 மாணவ, மாணவிகள் பயன்பெற உள்ளதாக மாவட்ட ஆட்சியர் தெரிவித்தார். காலை உணவு திட்டம் மூலம் மாணவர்களின் ஊட்டச்சத்தை மேம்படுத்துவதுடன், பசியின்றி வகுப்பறைக்கு வந்து கல்வியில் கவனம் செலுத்துவதை உறுதி செய்ய முடியும் என்றும் அவர் கூறினார்.
மாவட்டத்தில் ஏற்கனவே 1,352 அரசு மற்றும் அரசு உதவி பெறும் பள்ளிகளில் மொத்தம் 77,087 மாணவ, மாணவிகள் காலை உணவு திட்டத்தின் மூலம் பயன்பெற்று வருவதாகவும் ஆட்சியர் தெரிவித்தார். நிகழ்ச்சியில் அரசு அலுவலர்கள், ஆசிரியர்கள் மற்றும் மாணவர்கள் கலந்து கொண்டனர்.
