பூட்டான், அக்.30.
பூட்டானின் லெம்தாங்க் பகுதியில் பனி ஏரி உடைந்து வெள்ளப்பெருக்கு ஏற்பட்டுள்ளதைத் தொடர்ந்து, மேற்கு வங்கத்தின் டார்ஜிலிங், தெராய், துவார்ஸ் உள்ளிட்ட பகுதிகளுக்கு ரெட் அலர்ட் விடுக்கப்பட்டுள்ளது. மோ சு நதி வழியாக வெளியேறும் வெள்ளநீர் சங்கோஷ் நதியை நோக்கிப் பாய்ந்து வருவதால், தாழ்வான பகுதிகளில் வசிக்கும் மக்கள் பாதுகாப்பான இடங்களுக்குச் செல்ல அறிவுறுத்தப்பட்டுள்ளனர்.
ஆயிரக்கணக்கான மக்கள் பாதுகாப்பான இடங்களுக்கு மாற்றம்!
வெள்ள அபாயத்தைத் தொடர்ந்து மாநில மற்றும் தேசிய பேரிடர் மீட்புப் படையினர் மீட்பு மற்றும் முன்னெச்சரிக்கை நடவடிக்கைகளில் ஈடுபட்டுள்ளனர். இதுவரை சுமார் 4,000 முதல் 5,000 பேர் பாதுகாப்பான இடங்களுக்கு மாற்றப்பட்டுள்ளனர். மேலும், 6,000-க்கும் மேற்பட்டோர் இடம்பெயரத் தயாராக உள்ளனர். பள்ளிக் கட்டிடங்கள் நிவாரண முகாம்களாக மாற்றப்பட்டு, அங்கு உணவு, குடிநீர் உள்ளிட்ட அத்தியாவசிய வசதிகள் ஏற்பாடு செய்யப்பட்டுள்ளன.
தொடர்ந்து நீடிக்கும் சிவப்பு எச்சரிக்கை!
வெள்ளநீரின் வேகம் சற்று குறைந்துள்ளதாக அதிகாரிகள் தெரிவித்தாலும், சங்கோஷ் நதியில் வெள்ளப்பெருக்கு ஏற்படக்கூடும் என்ற அச்சம் நீடிக்கிறது. இதனால் பாதிக்கப்படக்கூடிய பகுதிகளில் வசிக்கும் மக்கள் எச்சரிக்கையுடன் இருக்குமாறு அறிவுறுத்தப்பட்டுள்ளனர். நிலைமையை பூட்டான் அதிகாரிகள் மற்றும் பேரிடர் மீட்புக் குழுவினர் தொடர்ந்து கண்காணித்து வருகின்றனர்.
