விளாத்திகுளம், அக். 6:
தூத்துக்குடி மாவட்டம் விளாத்திகுளம் காமராஜர் நகரைச் சேர்ந்த தனலட்சுமி (37), தமிழக வெற்றிக் கழகம் தொடங்கிய நாள் முதல் கட்சியில் பணியாற்றி வருவதாக கூறப்படுகிறது. இந்நிலையில், கட்சி நிர்வாக விவகாரம் தொடர்பாக ஏற்பட்ட தகராறில், தன்னை தவெக நகர செயலாளர் முத்துராமலிங்கசேதுபதி மற்றும் அவரது மனைவி சௌந்தர்யா ஆகியோர் வீட்டிற்கு வந்து தாக்கியதாக தனலட்சுமி காவல் நிலையத்தில் புகார் அளித்துள்ளார்.
கடந்த அக்.2 அன்று, நகர செயலாளர் தன்னை தொலைபேசியில் தொடர்புகொண்டு, தன்னை மதிக்காமல் மாவட்ட செயலாளரை சந்தித்தது குறித்து வாக்குவாதத்தில் ஈடுபட்டதாக தனலட்சுமி தெரிவித்துள்ளார். பின்னர் வீட்டிற்கு வந்த இருவரும் தன்னை ஆபாசமாக பேசி, செருப்பால் தாக்கியதுடன், விளக்கமாறை வீசி கீழே தள்ளி தாக்கியதாகவும் அவர் புகாரில் குறிப்பிட்டுள்ளார். இதில் தனலட்சுமிக்கு மன உளைச்சல் ஏற்பட்டதாக கூறப்படுகிறது.
இதுதொடர்பாக தனலட்சுமி அளித்த புகாரின் அடிப்படையில், விளாத்திகுளம் காவல் நிலைய போலீசார் முத்துராமலிங்கசேதுபதி மீது பெண்கள் துன்புறுத்தல் உள்ளிட்ட 3 பிரிவுகளின் கீழ் வழக்குப்பதிவு செய்துள்ளனர். இதையடுத்து தலைமறைவாக உள்ள அவரை போலீசார் தேடி வருகின்றனர்.
ஏற்கனவே எட்டையாபுரம் நகர செயலாளர் கனகராஜ் மற்றும் அவரது சகோதரர் கார்த்திக் ஆகியோர் இளம்பெண் குடும்பத்தினருக்கு அரிவாளுடன் மிரட்டல் விடுத்ததாக கூறப்படும் சம்பவம் பரபரப்பை ஏற்படுத்தியிருந்த நிலையில், தற்போது விளாத்திகுளம் நகர செயலாளர் மீது கட்சி நிர்வாகி பெண் புகார் அளித்துள்ள சம்பவம் அப்பகுதியில் பரபரப்பை ஏற்படுத்தியுள்ளது.
