கன்னியாகுமரி, அக். 16:
அரசு நிர்ணயித்த கட்டணத்தை விட அதிகமாகத் தனியார் மருத்துவக் கல்லூரிகள் வசூலித்தால், சம்பந்தப்பட்ட கல்லூரிகள் மீது நடவடிக்கை எடுக்கப்படும் என மக்கள் நல்வாழ்வுத்துறை அமைச்சர் அருண்ராஜ் தெரிவித்துள்ளார்.
கன்னியாகுமரி மாவட்டம் ஆசாரிப்பள்ளம் அரசு மருத்துவக் கல்லூரி மருத்துவமனையில் ஆய்வு மேற்கொண்ட அவர், செய்தியாளர்களிடம் பேசும்போது, கூடுதல் கட்டணம் வசூலிப்பது தொடர்பாகப் பெற்றோரும் மாணவர்களும் அரசிடம் புகார் அளிக்கலாம் என்றார். சென்னையில் உள்ள ஒரு தனியார் மருத்துவக் கல்லூரியில் கூடுதல் கட்டணம் வசூலித்ததாகப் புகார் வந்ததைத் தொடர்ந்து, அந்தக் கல்லூரி நிர்வாகத்துக்கு எச்சரிக்கை விடுக்கப்பட்டுள்ளதாகவும் தெரிவித்தார்.
தமிழகத்தில் அரசு மருத்துவமனைகளின் வசதிகளை மேம்படுத்தும் நோக்கில் மாவட்டந்தோறும் ஆய்வுகள் மேற்கொள்ளப்பட்டு வருவதாக அமைச்சர் கூறினார். கன்னியாகுமரி மாவட்டத்தில் இந்தப் பட்ஜெட்டில் மொத்தம் ரூ.36.01 கோடி மதிப்பிலான திட்டங்கள் அறிவிக்கப்பட்டுள்ளதாகத் தெரிவித்தார்.
ஆசாரிப்பள்ளம் அரசு மருத்துவக் கல்லூரி மருத்துவமனையில் ரூ.12 கோடி மதிப்பில் புதிய தாய் சேய் நலக் கட்டிடத்தின் கூடுதல் தளங்கள் அமைக்கப்பட உள்ளன. பத்மநாபபுரம் அரசு மருத்துவமனையில் அவசர மற்றும் வெளிநோயாளிகள் பிரிவுகளை மேம்படுத்த ரூ.5 கோடியும், வடிவீஸ்வரம் நகர்ப்புற ஆரம்ப சுகாதார நிலையத்தை நகர்ப்புற சமுதாய சுகாதார மையமாகத் தரம் உயர்த்த ரூ.2.84 கோடியும் ஒதுக்கீடு செய்யப்பட்டுள்ளதாகக் கூறினார்.
மேலும், சுருளக்கோடு மற்றும் குட்டக்குழி ஆரம்ப சுகாதார நிலையங்களில் கூடுதல் கட்டடங்கள் அமைக்க ரூ.1.5 கோடியும், பத்மநாபபுரம் அரசு மாவட்ட தலைமை மருத்துவமனையில் நவீன சமையலறை அமைக்க ரூ.1 கோடியும் அறிவிக்கப்பட்டுள்ளதாக அமைச்சர் தெரிவித்தார்.
இந்தத் திட்டங்களைச் செயல்படுத்த அடுத்த மூன்று முதல் நான்கு மாதங்களுக்குள் அரசாணைகள் வெளியிடுவது உள்ளிட்ட நடவடிக்கைகள் மேற்கொள்ளப்பட்டு வருவதாகவும் கூறினார். கடந்த ஆட்சியில் போதிய மருத்துவப் பணியிடங்கள் உருவாக்கப்படாததால் சில மருத்துவமனைகளில் மருத்துவர்கள் பற்றாக்குறை இருப்பதாகக் குறிப்பிட்ட அவர், தேவையான இடங்களில் மருத்துவர்கள் நியமிக்கப்படுவார்கள் என்றும், கன்னியாகுமரி மாவட்டத்தில் புற்றுநோயாளிகளுக்குத் தேவையான மருத்துவ உபகரணங்கள் ஏற்பாடு செய்யப்படும் என்றும் தெரிவித்தார்.
