தென்காசி | செப். 23: சங்கரன்கோவில் மற்றும் சுற்றுவட்டார கிராமங்களில் பொதுமக்கள் தலைமுறை தலைமுறையாக பயன்படுத்தி வரும் சொந்த மற்றும் விவசாய நிலங்களை, சங்கரநாராயணசுவாமி கோயில் நிலங்கள் என அறிவித்ததையும், அந்த நிலங்களுக்கான வழிகாட்டி மதிப்பை பூஜ்ஜியமாக மாற்றியதையும் ரத்து செய்ய வேண்டும் என சங்கரன்கோவில் சட்டமன்ற உறுப்பினர் திலீபன் ஜெய்சங்கர், மாவட்ட ஆட்சியர் ரஞ்சித் சிங்கிடம் மனு அளித்துள்ளார்.
மனுவில், சம்பந்தப்பட்ட நிலங்களுக்கு பொதுமக்களிடம் பட்டா, தீர்வை ரசீது உள்ளிட்ட வருவாய்த்துறை ஆவணங்கள் இருப்பதாகவும், கோயில் நிலம் என்பதற்கான உரிய கிரைய ஆவணங்கள் உள்ளிட்டவை இந்து சமய அறநிலையத்துறை அல்லது கோயில் நிர்வாகத்திடம் இல்லை என்றும் தெரிவிக்கப்பட்டுள்ளது. வழிகாட்டி மதிப்பு பூஜ்ஜியமாக மாற்றப்பட்டதால் நிலங்களை விற்கவோ, அடமானம் வைக்கவோ, வாரிசுகளுக்கு பிரித்து வழங்கவோ முடியாமல் மக்கள் பாதிக்கப்பட்டுள்ளதாகவும் கூறப்பட்டுள்ளது.
பின்னர் செய்தியாளர்களிடம் பேசிய எம்எல்ஏ திலீபன் ஜெய்சங்கர், சுமார் 20 கிராமங்களைச் சேர்ந்த மக்கள் தங்களிடம் முறையான ஆவணங்கள் இருந்தும் நிலங்களை பயன்படுத்த முடியாத நிலையில் இருப்பதாக தெரிவித்தார். மேலும், இந்த விவகாரம் தொடர்பாக துறை அமைச்சரிடமும் மனு அளித்துள்ளதாகவும், நீதிமன்றத்திலும் பொதுமக்கள் தங்களது ஆவணங்களை சமர்ப்பித்துள்ளதாகவும் கூறினார். இதுகுறித்து மாவட்ட ஆட்சியர் உரிய விசாரணை நடத்தி நடவடிக்கை எடுப்பதாக தெரிவித்ததாகவும் அவர் கூறினார்.
