ஈரோடு, ஜூலை 28 –
ஈரோடு மாவட்டத்தில் நிலமற்ற பட்டியல் இன மக்களுக்கு அரசு நிலங்களை ஒதுக்கி பட்டா வழங்க நடவடிக்கை எடுக்க வேண்டும் எனக் கோரி தலித் விடுதலை இயக்கம் சார்பில் மாவட்ட ஆட்சியரிடம் மனு அளிக்கப்பட்டது.
அந்த மனுவில் கூறியிருப்பதாவது: ஈரோடு மாவட்டம் அந்தியூர் வட்டம் மற்றும் சுற்றுவட்டாரப் பகுதிகளில் சுமார் 250 பட்டியல் இன குடும்பங்கள் பல ஆண்டுகளாக நிலமின்றி வசித்து வருகின்றன. இக்குடும்பங்களுக்கு வாழ்வாதாரத்திற்கும் குடியிருப்பிற்கும் தேவையான நிலம் வழங்க வேண்டும் என வலியுறுத்தப்பட்டுள்ளது.
மேலும், சருகு, கோபி, அந்தியூர் உள்ளிட்ட பகுதிகளில் அரசுக்குச் சொந்தமான காலி நிலங்கள் இருப்பதாகவும், அவற்றை நிலமற்ற பட்டியல் இன மக்களுக்கு ஒதுக்கி பட்டா வழங்க வேண்டும் என்றும் கோரப்பட்டுள்ளது. இதற்காக கடந்த காலங்களில் பலமுறை அரசிடம் மனுக்கள் அளிக்கப்பட்டிருந்தும் இதுவரை உரிய நடவடிக்கை எடுக்கப்படவில்லை என மனுவில் தெரிவிக்கப்பட்டுள்ளது.
மேலும், கடந்த 25.06.2026 அன்று நடைபெற்ற ஆய்வுக் கூட்டத்தில், நிலமற்ற பட்டியல் இன மக்களுக்கு நிலம் வழங்குவது தொடர்பாக அதிகாரிகள் பரிசீலனை மேற்கொண்டதாகவும் குறிப்பிடப்பட்டுள்ளது.
நிலமற்ற குடும்பங்களின் சமூக மற்றும் பொருளாதார முன்னேற்றத்தை கருத்தில் கொண்டு, அரசு கையிருப்பு நிலங்கள் அல்லது அரசு கட்டுப்பாட்டில் உள்ள நிலங்களை அடையாளம் கண்டு, உரிய பட்டா வழங்க மாவட்ட நிர்வாகம் விரைந்து நடவடிக்கை எடுக்க வேண்டும் என தலித் விடுதலை இயக்கம் வலியுறுத்தியுள்ளது.
