வேதநாயகம் பிள்ளையின் 198-வது பிறந்தநாள் விழா

கிபி 1826-ஆம் ஆண்டு அக்டோபர் 11-ஆம்  தேதி திருச்சி அருகே  குளத்தூரில் கவிஞர் மாயூரம் வேதநாயகம் பிள்ளை பிறந்தார்.  பின்பு  மயிலாடுதுறையில் கோர்ட் முன்சீப்பாக  (நீதிபதியாக)  பணியாற்றிய அவர்,  மயிலாடுதுறை  நகராட்சியில்  முதல் நகர்மன்ற  தலைவராக  பதவி வகித்தார்.  தமிழ் மீது  கொண்ட பற்றின்  காரணமாக  பல்வேறு தமிழ்,  இலக்கிய நூல்களை எழுதியவர்.  வெளிநாடுகளில் பிரபலமாகி  வந்த நாவல்  கதைகளைப்போன்று தமிழின் முதல் நாவலான  பிரதாபமுதலியார்  சரித்திரத்தை  எழுதினார். இதனால் தமிழ் முதல்  புதினத்தை  இயற்றியவர் என்ற பெயர் பெற்றார். அவரது 198-வது  பிறந்ததினம் இன்று  மயிலாடுதுறையில்  அனைத்துத் தமிழ் அமைப்புகள் சார்பில் கொண்டாடப்பட்டது. தமிழுக்கு  தொண்டாற்றிய  வேதநாயகம் பிள்ளையின் திருவுருவ சிலை மயிலாடுதுறை கல்லறைத் தோட்டத்தில்  அமைந்துள்ளது.  அண்ணாரது  திருவுருவ  சிலைக்கு  தமிழ் சங்கம் நிறுவன தலைவர் பவுல்ராஜ், மயிலாடுதுறை எம்எல்ஏ ராஜகுமார், வர்த்தக சங்கத்தின் தலைவர் மதியழகன் உள்ளிட்ட பொதுமக்கள் ஏராளமானோர் மலர் மாலை அணிவித்தும், மலர் தூவியும்  அஞ்சலி செலுத்தினர்.