சிவகங்கை, செப். 28:
தேர்தல் ஆணையர் ஞானேஷ்குமார் பதவி விலகக் கோரி, இந்திய தேசிய காங்கிரஸ் கட்சி சார்பில் நாடு முழுவதும் கண்டன ஆர்ப்பாட்டங்கள் நடைபெற்றன. இதன் ஒரு பகுதியாக சிவகங்கை மாவட்டம் காரைக்குடியில் முன்னாள் மத்திய நிதியமைச்சர் ப.சிதம்பரம் தலைமையில் கண்டன ஆர்ப்பாட்டம் நடைபெற்றது. இதில் கட்சி நிர்வாகிகள் மற்றும் தொண்டர்கள் பலர் கலந்து கொண்டனர்.
ஆர்ப்பாட்டத்தில் பேசிய ப.சிதம்பரம், சுதந்திரமான மற்றும் நியாயமான தேர்தல் ஜனநாயகத்தின் அடிப்படை என தெரிவித்தார். முன்னாள் தலைமைத் தேர்தல் ஆணையர் டி.என். சேஷன் தேர்தல் நடைமுறையில் பல்வேறு சீர்கேடுகளை நிவர்த்தி செய்ததாகக் குறிப்பிட்ட அவர், தற்போதைய தலைமைத் தேர்தல் ஆணையர் ஞானேஷ்குமாரின் செயல்பாடுகள் குறித்து நாடு கேள்வி எழுப்புவதாக கூறினார்.
மேலும், வாக்குரிமை என்பது எந்தவொரு குடிமகனுக்கும் மறுக்க முடியாத உரிமை என்றும், 21 வயதுக்கு மேற்பட்டவர்களுக்கு வாக்குரிமை வழங்கப்பட்டதும், பின்னர் 18 வயதாக குறைக்கப்பட்டதும் குறித்து அவர் பேசினார்.
SIR எனப்படும் சிறப்பு தீவிர வாக்காளர் பட்டியல் திருத்த நடவடிக்கையை விமர்சித்த ப.சிதம்பரம், பல்வேறு கட்டங்களில் கோடிக்கணக்கான வாக்காளர்கள் பட்டியலில் இருந்து நீக்கப்பட்டுள்ளதாக குற்றம்சாட்டினார். மேற்கு வங்கத்தில் வாக்காளர் நீக்க நடவடிக்கைகள் தொடர்பாக தாக்கல் செய்யப்பட்ட மேல்முறையீடுகளில் கணிசமான எண்ணிக்கையிலானோர் மீண்டும் வாக்காளர் பட்டியலில் சேர்க்கப்பட்டுள்ளதாகவும் அவர் குறிப்பிட்டார்.
இதனை அடிப்படையாகக் கொண்டு, நாடு முழுவதும் SIR நடவடிக்கையால் நீக்கப்பட்ட வாக்காளர்கள் மேல்முறையீடு செய்தால் பெரும் எண்ணிக்கையிலானோர் மீண்டும் சேர்க்கப்பட வாய்ப்புள்ளதாக ப.சிதம்பரம் கூறினார். SIR நடவடிக்கை ஜனநாயகத்திற்கு பாதிப்பை ஏற்படுத்துவதாகக் கூறிய அவர், தேர்தல் ஆணையம் பொறுப்பேற்று பதவி விலக வேண்டும் என வலியுறுத்தினார்.
மேலும், தகவல் அறியும் உரிமைச் சட்டத்தின் கீழ் SIR முடிவு தொடர்பாக கேட்கப்பட்டபோது, அந்த முடிவை எடுத்ததற்கான குறிப்பிட்ட கோப்பு இல்லை என தேர்தல் ஆணையத்தின் செயலாளர் தெரிவித்ததாக ப.சிதம்பரம் கூறினார். இதனை அவர் கடுமையாக விமர்சித்ததுடன், SIR நடவடிக்கையை “வாக்கு திருட்டு” என விமர்சித்தார்.
காரைக்குடி முன்னாள் சட்டமன்ற உறுப்பினர் மாங்குடி உள்ளிட்ட காங்கிரஸ் கட்சி நிர்வாகிகள் பலர் இந்த ஆர்ப்பாட்டத்தில் கலந்து கொண்டனர்.
