நிழல் இல்லா நேரத்தை கண்டுபிடித்த ஆர்வலர்கள்

தென்தாமரைகுளம்., ஏப. 12.
தமிழ்நாடு அஸ்ட்ரானமி சயின்ஸ் சொசைட்டி சார்பில் அகத்தீஸ்வரம் விவேகானந்தா கல்லூரியில் நிழல் இல்லா நாளை முன்னிட்டு நிழல் இல்லா நேரத்தை கண்டறிந்தனர்.

நிழல் இல்லா நாள் என்பது அரிய வான் நிகழ்வாகும்.நண்பகலில் சூரியன் நேரடியாக தலைக்கு மேல் இருக்கும் போது வருடத்திற்கு இரண்டு முறை நிகழும் நிகழ்வாகும். 23.5டிகிரி வடக்கு அட்சரேகைக்கும் 23.5டிகிரி தெற்கு அட்சரேகைக்கும் இடைப்பட்ட கடகரேகைக்கும் மகரரேகைக்கும் இடைப்பட்ட இடங்களில் நிகழ்கிறது. தமிழகத்தில் கன்னியாகுமரியில் ஏப்ரல் மாதம் 10ம்தேதி தொடங்கி சென்னையில் 24ம் தேதி நிழல் இல்லா நாளாகும். ஏப்.10ம் தேதி கன்னியாகுமரி, நாகர்கோவில், ஏப்-11ம் தேதி திருச்செந்தூர், சாத்தான்குளம், ஏப்.12ம் தேதி தென்காசி, திருநெல்வேலி,தூத்துக்குடி, ஏப்.13ம்தேதி கோவில்பட்டி, சங்கரன்கோவில், ராமேஸ்வரம், ராமநாதபுரம். ஏப்.14ம் தேதி கம்பம், ராஜபாளையம், சிவகாசி, விருதுநகர், பரமக்குடி ஆகிய ஊர்களில் நிழல் இல்லா நாளாகும்.

இதனை முன்னிட்டு அகத்தீஸ்வரம் விவேகானந்தா கல்லூரியில் நடந்த நிகழ்ச்சியில் மாணவர்கள் மற்றும் அறிவியல் ஆர்வலர்கள் வட்டமாக நின்றும், ஒரு மேஜையில் வட்ட வடிவில் உள்ள பொருளின் மையப்பகுதியில் ஒரு குச்சியை ஊன்றி நிழலை அளவு செய்தனர்.இதில் சரியாக 12:22 மணிக்கு நிழல் இல்லா நேரத்தை கண்டறிந்தனர்.

இந்நிகழ்ச்சிக்கு தூத்துக்குடி மாவட்ட அஸ்ட்ரோ கிளப் தலைவர் பேராசிரியர் ஜான்பிரின்ஸ் சௌந்திரநாயகம் தலைமை வகித்தார்.
விவேகானந்தா கல்லூரி பொருளியல் துறை தலைவர் குருசாமி,கன்னியாகுமரி ரோட்டரி சங்க நிர்வாகி ஜெயமதி,ஆகியோர் முன்னிலை வகித்தார்.
இயற்பியல்துறை பேராசிரியர் ஜெயசெல்வன் அனைவரையும் வரவேற்றார்.

கோபால் ஆரியபட்டா ஒருங்கிணைப்பாளர் சஞ்சய்குப்தா கலந்து கொண்டு நிழல் இல்லா நாள் கண்டறிவது குறித்து செயல் விளக்கத்துடன் பயிற்சி அளித்தார். இதில் டாஸ் மாநில செயற்குழு உறுப்பினர் முத்துச்சாமி,ஆரியபட்டா செயற்பாட்டாளர் அஜய்,பேராசிரியர்கள் கோமதிநாயகம்,லாரன்ஸ்,மணிக்கண்ணன் உள்பட
கல்லூரி மாணவர்கள் கலந்து கொண்டனர்.முடிவில் பேராசிரியர் பேட்ரிக் நன்றி கூறினார்.