தருமபுரி, ஜூலை 27 –
தருமபுரி நகர பகுதியில் அமைந்துள்ள குப்பாகவுண்டர் தெருவில் அருள்பாலிக்கும் பிரசித்தி பெற்ற அருள்மிகு மாரியம்மன் திருக்கோவிலின் வருடாந்திர ஆடித்திருவிழா, பக்தி நிறைந்த சூழலில் தொடங்கியது. ஆண்டுதோறும் சிறப்பாக நடைபெறும் இந்த திருவிழா, இந்த ஆண்டும் ஏராளமான பக்தர்களின் பங்கேற்புடன் வெகு விமரிசையாக நடைபெற்றது.
திருவிழாவையொட்டி குப்பாகவுண்டர் விநாயகர் கோவிலில் இருந்து பால்குட ஊர்வலம் தொடங்கப்பட்டது. சிறப்பு பூஜைகளுக்கு பின்னர், அம்மனின் திருநாமங்களை முழங்கியபடி, பக்தர்கள் தலையில் பால்குடங்களை சுமந்து நேர்த்திக்கடனை நிறைவேற்றினர். இந்த பால்குட ஊர்வலம் குப்பாகவுண்டர் விநாயகர் கோவிலில் இருந்து புறப்பட்டு, தருமபுரி கடைவீதி, அவ்வையார் அரசு மகளிர் மேல்நிலைப்பள்ளி வழியாக மீண்டும் குப்பாகவுண்டர் தெருவில் உள்ள அருள்மிகு மாரியம்மன் கோவிலை வந்தடைந்தது. ஊர்வலம் சென்ற வழியெங்கும் பக்தர்கள் வரவேற்று, தீபாராதனை காட்டி அம்மனின் அருளைப் பெற்றனர்.
பெண்கள், இளைஞர்கள், சிறுவர்கள் என அனைத்து தரப்பு மக்களும் பக்தி உணர்வுடன் பால்குடம் ஏந்தி கலந்து கொண்டது விழாவின் சிறப்பம்சமாக அமைந்தது. மேளதாளங்கள் முழங்க, அம்மன் பக்திப் பாடல்கள் ஒலிக்க, பக்தர்களின் கோஷங்களால் நகரமே ஆன்மிகச் சூழலால் நிரம்பியது.
பால்குட ஊர்வலம் கோவிலை வந்தடைந்ததைத் தொடர்ந்து, அருள்மிகு மாரியம்மனுக்கு பக்தர்கள் கொண்டு வந்த புனித பாலால் சிறப்பு அபிஷேகம் நடைபெற்றது.
பின்னர் மலர்கள் மற்றும் பல்வேறு அலங்காரங்களால் அம்மன் எழில்மிகு திருக்கோலத்தில் பக்தர்களுக்கு அருள்பாலித்தார். ஆயிரக்கணக்கான பக்தர்கள் நீண்ட வரிசையில் காத்திருந்து சாமி தரிசனம் செய்தனர். திருவிழாவின் முக்கிய நிகழ்ச்சியாக ஜூலை 27 மற்றும் 28 ஆகிய நாட்களில் அம்மனுக்கு மகா அபிஷேகம், சிறப்பு அலங்காரம், பூஜைகள் நடைபெற உள்ளது. இதே போல் கோவிலில் அருள் பாலிக்கும் விநாயகர், மகாலட்சுமி, மகாவிஷ்ணு மற்றும் முருகப்பெருமான் சன்னதிகளிலும் சிறப்பு அபிஷேகங்கள் மற்றும் வழிபாடுகள் நடைபெற்றன.
இந்த ஆண்டு திருவிழாவில் தருமபுரி மற்றும் சுற்று வட்டார பகுதி சேர்ந்த ஏராளமான பக்தர்கள் கலந்து கொண்டு நேர்த்திக்கடன்களை நிறைவேற்றி அம்மனின் அருளை பெற்றனர். பக்தர்களின் திரளான பங்கேற்பால் குப்பா கவுண்டர் தெரு முழுவதும் திருவிழா கோலமாக காட்சி யளித்தது. விழா குழுவினர் சார்பில் அனைவருக்கும் பிரசாதங்கள் மற்றும் அன்னதானம் வழங்கப்பட்டது.
