நாகர்கோவில், ஜூன் 5 –
உலக சுற்றுச்சூழல் தினத்தை முன்னிட்டு, கன்னியாகுமரி மாவட்ட பள்ளிக்கல்வித்துறையின் சார்பில் அனைத்து பள்ளி வளாகங்களிலும் மரக்கன்றுகள் நடும் விழா இன்று 5-ம் தேதி நடைபெற்றது. நாகர்கோவில் எஸ்.எல்.பி அரசு மேல்நிலைப்பள்ளி வளாகத்தில் நடைபெற்ற மரக்கன்றுகள் நடும் விழாவில் மாவட்ட மாவட்ட ஆட்சித்தலைவர் மு.பிரதாப் கலந்துகொண்டு மரக்கன்றுகளை நடவு செய்தார்.
பின்னர் அவர் கூறியதாவது: தமிழ்நாடு அரசு பசுமை தமிழ்நாடு திட்டத்தினை தீவிரமாகச் செயல்படுத்தி வருகிறது. ஏற்கனவே பசுமை சூழல் நிறைந்த கன்னியாகுமரி மாவட்டத்தில், அந்தச் சூழலைத் தக்கவைக்கவும், மேலும் மேம்படுத்தவும் பல்வேறு திட்டங்கள் மாவட்ட நிர்வாகத்தால் முன்னெடுக்கப்பட்டுள்ளன. மேலும் பள்ளி, கல்லூரிகளில் பசுமைச் சூழலை அதிகப்படுத்த மாவட்ட முதன்மைக் கல்வி அலுவலர் மூலம் அனைத்துப் பள்ளிகளுக்கும் மரக்கன்றுகள் நட அறிவுறுத்தப்பட்டுள்ளது.
அதன்படி, பள்ளிகளில் மரக்கன்றுகள் நடுதல் மற்றும் சுற்றுச்சூழல் விழிப்புணர்வு நிகழ்வுகள் நடத்தப்பட்டு வருகின்றன. ஒவ்வொரு பள்ளியிலும் சிறப்பாகச் செயல்பட்டு வரும் ‘பசுமைப் படையை மேலும் வலுப்படுத்த வாரம் ஒருமுறை 15 நிமிடங்கள் மாணவர்களுக்குப் புவி வெப்பமயமாதல் குறித்தும், அதனால் ஏற்படும் விளைவுகள் குறித்தும் விழிப்புணர்வை ஏற்படுத்த தலைமையாசிரியர்கள் மற்றும் ஆசிரியர்களுக்கு அறிவுறுத்தப்பட்டுள்ளது.
இளம் வயதிலேயே மாணவர்களுக்குச் சுற்றுச்சூழலின் முக்கியத்துவத்தை உணர்த்துவதன் மூலம், எதிர்காலத்தில் அவர்கள் மேற்கொள்ளும் அனைத்து வளர்ச்சிப் பணிகளிலும் பசுமையை ஒரு கருத்தாகக் கொண்டு செயல்படுவார்கள். இந்த நிகழ்வு பள்ளிகளில் மட்டுமின்றி, மாவட்டம் முழுவதும் தொடர்ந்து நடைபெறும். மாணவர்கள் சுற்றுச்சூழல் பாதுகாப்பில் தங்களை ஈடுபடுத்திக்கொண்டு, தங்கள் வீடுகள் மற்றும் நண்பர்களிடம் விழிப்புணர்வை ஏற்படுத்தும் தூதுவர்களாகச் செயல்பட வேண்டும். இவ்வாறு கலெக்டர் கூறினார்.
முன்னதாக மாவட்ட ஆட்சித்தலைவர் பிரதாப், நாகர்கோவில் எஸ்.எல்.பி அரசு மேல்நிலைப்பள்ளி வளாகத்தில் மரக்கன்றுகள் நட்டு, சுற்றுச்சூழல் விழிப்புணர்வு உறுதிமொழியினை மாணவ மாணவியர்கள் உட்பட அனைவரும் ஏற்றுக்கொண்டார்கள்.
நடைபெற்ற நிகழ்ச்சியில் உதவி ஆட்சியர் பயிற்சி ர.மோனிகா, மாவட்ட கல்வி அலுவலர் தனியார் பள்ளிகள் அஜிதா, எஸ்.எல்.பி அரசு மேல்நிலைப்பள்ளி கிஷோர், ஆசிரியர்கள், மாணவர்கள் உட்பட பலர் கலந்து கொண்டார்கள்.
