நாகர்கோவில், அக். 4 –
மத்திய அரசின் ஸ்வஸத் நரி சஹாக்த் பரிவார் அபியான் நிகழ்ச்சியை முன்னிட்டு மருங்கூர் பேரூராட்சி மற்றும் குலசேகரம் ஸ்ரீ முகாம்பிகா மருத்துவக் கல்லூரி மருத்துவமனை இணைந்து ஆரோக்கியமான பெண்கள், வலுவான குடும்பம், வளமான சமூகம் அமைய நடைபெற்ற விழிப்புணர்வு முகாம் மற்றும் பேரணியினை சென்னை குழந்தைகள் நல சிறப்பு மருத்துவர் டாக்டர் தம்பரசி தொடங்கி வைத்து சிறப்புரையாற்றினார்.
அப்போது அவர் பேசும் போது கூறியதாவது: பெண்களுக்கு மார்பக புற்றுநோய் குறித்து போதுமான விழிப்புணர்வு ஏற்பட வேண்டும். நமது உடலினை ஆண்டுக்கு இருமுறையாவது மருத்துவ பரிசோதனை செய்து கொள்ள வேண்டும். குறிப்பாக சுகர், ரத்த அழுத்தம் பரிசோதனைகள் மேற்கொள்ள வேண்டும். முறையான உணவு பழக்க வழக்கங்களை கடைபிடிக்க வேண்டும். நோய் வருவதற்கு முன்பே அதனை தடுத்து உடலை பாதுகாக்க வேண்டும். நோயினை கண்டு பிடித்து குணப்படுத்தாவிட்டால் இக்கட்டான சூழ்நிலை ஏற்பட்டு விடும். குறிப்பாக மருத்துவர்களிடம் ஆரம்பத்திலேயே சிகிச்சை எடுத்துக் கொண்டால் நாம் நோயிலிருந்து எளிதில் விடுபடலாம். நோய் அதிகரிக்கும் முன்பே மருத்துவர்களிடம் சென்று விட்டால் நாம் மட்டுமின்றி, குடும்ப உறவுகள் பாதுகாக்கப்படும். பொருளாதார பாதிப்புகள் ஏற்படாது. அதற்கேற்ப நமது உடல்நிலையை பராமரித்து வர வேண்டும்.
நோய்களுக்கான அறிகுறிகள் காணப்பட்டாலோ, நமது உடல் சாதரண நிலையிலிருந்து அசாதரண நிலை ஏற்பட்டாலோ உடனடியாக மருத்துவரை அணுகி உரிய சிகிட்சைகளை எடுத்துக் கொள்ள வேண்டும். இதில் அலட்சியம் காண்பிக்கக் கூடாது. நோயினை அலட்சியம் செய்யாமல் அதை வராமல் தடுப்பதற்கு உரிய முன்னெச்சரிக்கை நடவடிக்கைகளை எடுக்க வேண்டும். பெண்கள் மார்பக புற்றுநோய் அறிகுறிகள் காணப்பட்டால் அதற்குரிய மருத்துவர்களிடம் காண்பித்து முறையான சிகிட்சையினை ஆரம்பத்திலே எடுத்து விட வேண்டும். மேலும் கர்ப்பப்பை வாய் புற்று நோய் பரிசோதனையும் மேற்கொள்ள வேண்டும். இதன் மூலம் நோய்களை ஆரம்பத்திலே கட்டுப்படுத்தி தடுக்க முடியும் என அவர் பேசினார்.
மருங்கூர் பேரூராட்சித் தலைவர் லெட்சுமி தலைமை வகித்தார். இந்நிகழ்ச்சியில் அகஸ்தீஸ்வரம் வடக்கு ஒன்றிய கழகச் செயலாளர் ஜெஸீம், மருங்கூர் பேரூர் கழகச் செயலாளர் சீனிவாசன், தோவாளை வடக்கு ஒன்றிய கழகப் பொருளாளர் வெங்கடேஷ், இரவிபுதூர் ஊராட்சி பொறுப்பாளர் செல்லம்பிள்ளை, முகாம்பிகா மருத்துவக் கல்லூரி பி.ஆர்.ஓ சூரஜ்குமார் உட்பட பலர் கலந்து கொண்டனர்.
